空軍的黑鷹直升機，初二載參謀總長沈一鳴等13位軍官，本底欲去宜蘭東澳嶺雷達站，慰勞官兵，煞意外發生，直升機頂8个人往生、5个人有活落來。現場上新消息是，有4名受傷情形較輕的，已經佇五點外落山，隨送去病院治療。
救難人員表示，災害現場無著火，毋過，佇直升機內發見參謀總長的時，伊已經無氣。也因為山區罩濛，看無啥清楚，現場無法用直升機吊掛救援。救難人員干焦會當用插的、共受傷較輕的患者，插落山。第一批的人員佇五點外落山，救護車也共四名患者送去附近的陽大醫院。搜救大隊也用步行的方式，按算共往生者的遺體送落山跤，可能愛到半暝仔，才會當運送到山跤。
